Gaigel   

Drei Manna´ond drui Tubakspfeifa´,

des geit a Luft – ma´ ja se greifa´.

Se hocket do mit raote Köpf

ond gaiglet om paar Hosaknöpf.
 

Se hebet a ond gent ond mischet

ond gucket daß se Trömpf vertwischet,

se streichet d Schnauzbärt, machet Sprüch

ond streitet om en jeda´Stich.
 

Dr Oa sait: „Sell wär nohmol schöner!“

ond fuchtlet mit dem Schippezehner,

ond wia der auf den Tisch nei´drischt-

nao guat, daß dear aus Oache ist.
 

Dr Ander sait: „Nao gstat, und wartea`

Narr, ander Leut hent au noh Karta`-

wart, Altere, dir stopf-ed Gosch…

Ond meldet Vierzge- so, do hosch!
 

Dr Dritte sait: „Nao koa`lange Predigt!

Em blaua Affa in Venedig

da spielt ma´ herzhaft, aber rau-

des stich i mit dr Schellasau“
 

Ond so gohts fort, se schreiet, händlet

ond bscheißet, wenns koanr sieht, ond schwendlet

ond saufet dronternei´

em Adlerwirt sein Most und Wei´….

                    (Sebastian Blau)