Früehleng

        Wenn d´Schneeglöckla em Garten läutet

        ond d´Schtara mit de Schpatza schreitet,

        wenn d´Hasa ihre Jonge kriaget,

        de erschte Bienla emsig fliaget,

        dr Seidelbast wenn blüeht em Wald

        no kommt dr Früehleng bald!

        Wenn d`Knoschpa an de Bäum so schwellet

        ond d´Kender emmer naus bloß wellet,

        wenn Oma weg vom Ofa sitzt

        ond d´Bettflasch´nemme wird erhitzt,

        wenn d´Baura gant zom „Bollenschera“

        no mueß doch Früehleng werra!

        Wenn d´Frau am Ma´fladdiera duet

        wega ma Kloid, wega ma Huet,

        ond wenn dr Ma´wird woich oms Herz,

        no isch´s meischtens Ende März

        ond bis er ihra´s Geld no geit

        no isch dr Früehleng nemme weit!

        Wenn d´Henna wieder besser leget

        ond d´Maurer sich au wieder reget,

        wenn´s oim em Kopf ganz dremmling ischt

        ond en de Glieder müed du bischt,

        wenn i mit Kohlaschtaub bloß schür´

        no schtoht dr Früehleng vor dr Dür´!

            (Kurt Köder)