En dr Fasnet   

          Ei´trittsgelder ond Girlanda,

        bonde Kappa, Musikanta,

        Maska, Nas, gmaolde Gsichter,

        Bloamaschmuck ond roade Lichder,

        Budena für Sekt ond Wei´:

        Heut will älles narret sei´!

          Dicka Luft, koi Platz zom sitza,

        schwofa, drucka, schieba, schwitza,

        woiche Kräga, leichde Gwänder,

        falscher Schmuck ond grelle Bänder,

        dicke ond ao dürre Leut:

        Älle send se narret heut!

        Jonge Stift ond gstandne Moischder,

        net grad schlanke Küchegoischder,

        Scheichs ond ao äls Sportskanona,

        Hennazüchder als Barona

        sell sieht bald a jedes Kend,

        daß dia heut reacht narret send.

        Rittersleut ond Edelknappa

        sieht ma stolz em Saal romdappa,

        Rattafänger ond Matrosa,

        Haremsdame, Pfluderhosa,

        wilde Cowboy mit ma Colt,

        Mauerbleamla, zart ond hold.

        Falsche Fufzger, faule Reda,

        Liabesschwür ond viel Moneta,

        Braotwurschtsoßa aufm Rücka

        enge Schuah ond Miaderdrücka…

        Schliaßlich ganget dLiachder aus,

        ond ma schleicht sich müad nach Haus….

        Katzenjammer, Kaffeebohna:

        Leut – da will i ui´verschona!

        Hereng, Omschläg, Gliederreißa:

        oiner soll mr dao beweisa,

        ebbess soddigs, sell sei fei´!

        Dear muaß schao reacht narret sei´!

                    (Verfasser: Rudolf Weit)